En Galicia existe un valioso acervo histórico-patrimonial de carácter educativo que se foi configurando e incrementando no devir das décadas nos centros educativos, onde actualmente permanece depositado e custodiado.

No ano 2002, tendo presente a inquedanza dos Institutos e a administración por preservar todo este acervo patrimonial, comenzaron as primeiras reunións dos representantes dos Institutos Históricos de Galicia e do equipo do Museo Pedagóxico de Galicia para iniciar un acordo de colaboración co obxectivo de preservar e poñer en valor o patrimonio que albergan estes centros. Ambas partes rubricaron nese momento, un protocolo de carácter asociativo que facilita a interconexión e funcionamento de cada unha das partes e que se denominou "Rede Mupega".

Deste xeito, o Mupega actúa como eixe vertebrador para promover o desenvolvemento dunha normativa autonómica co obxectivo de, non só garantir a conservación e poñer en valor o patrimonio de cada un dos seis Institutos Históricos da nosa comunidade, senón tamén de facilitar a xestión das coleccións nos propios centros e crear un procedemento para que outros centros que a día de hoxe non pertencen a Rede Mupega poidan ter a consideración e recoñecemento de Instituto Históricos.