A Lei 16/2010, do 17 de decembro, de organización e funcionamento da Administración xeral e do sector público autonómico de Galicia regulou no seu título III o réxime xurídico das entidades instrumentais do sector público autonómico e estableceu os instrumentos de planificación anual e plurianual da actividade das devanditas entidades instrumentais.

En concreto, a devandita lei preveu os seguintes instrumentos de planificación das entidades instrumentais:

• plans anuais de actuación,
• plans plurianuais iniciais
• e contratos de xestión.

A Lei 12/2011, do 26 de decembro, modificou o Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, estendendo a posibilidade de asinar contratos programa (que se equiparan ao contratos plurianuais de xestión) a outro tipo de entidades, mencionando de xeito expreso as seguintes:

• as entidades públicas empresariais,
• as sociedades mercantís públicas autonómicas,
• as fundacións do sector público autonómico,
• os consorcios públicos autonómicos
• e demais entidades instrumentais do sector público autonómico non recollidas no orzamento consolidado.