-
Antecedentes:
Por orde da Consellería do Mar do 8 de xullo de 2020 foron convocadas as eleccións para a renovación do consello regulador da Denominación de Orixe Mexillón de Galicia. A toma de posesión dos membros do pleno do consello regulador realizouse o 13 de novembro de 2020.
De acordo co Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores, resulta necesario proceder á convocatoria electoral para a renovación dos órganos de goberno do Consello Regulador da DOP Mexillón de Galicia-Mejillón de Galicia, co fin de garantir a continuidade institucional e o normal funcionamento da entidade.
-
Problemas que se pretenden solucionar:
A presente norma ten por obxecto posibilitar a renovación dos órganos de goberno do Consello Regulador da Denominación de Orixe Protexida Mexillón de Galicia-Mejillón de Galicia, unha vez rematado o mandato das persoas integrantes do seu Pleno.
Así mesmo, preténdese garantir a continuidade institucional e o normal funcionamento do Consello Regulador, asegurando a representación democrática dos distintos subsectores inscritos e a adecuada xestión da denominación de orixe protexida.
-
Necesidade e oportunidade da súa aprobación:
A aprobación desta orde resulta necesaria para dar cumprimento ao previsto no Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores, así como no Regulamento da Denominación de Orixe Protexida Mexillón de Galicia-Mejillón de Galicia, aprobado pola Orde do 20 de marzo de 2019, no relativo á renovación dos órganos de goberno do Consello Regulador.
Polo que respecta á oprtunidade, a convocatoria das eleccións permite garantir o normal funcionamento do Consello Regulador, asegurando a representación democrática dos distintos sectores implicados.
-
Obxectivos:
O obxecto da orde é convocar as eleccións para a renovación dos membros do Pleno do Consello Regulador da Denominación de Orixe Protexida Mexillón de Galicia-Mejillón de Galicia, así como establecer as normas reguladoras do correspondente proceso electoral.
-
Posibles solucións, alternativas, regulatorias e non regulatorias:
Non existen alternativas non regulatorias para acadar o obxectivo pretendido, dado que a convocatoria das eleccións e a regulación do proceso electoral do Consello Regulador deben realizarse mediante unha disposición de carácter regulamentario.
Así mesmo, resulta necesario aprobar unha nova orde que substitúa a Orde do 8 de xullo de 2020, ao tratarse dunha convocatoria electoral referida a un novo proceso de renovación dos órganos de goberno do Consello Regulador da Denominación de Orixe Protexida Mexillón de Galicia-Mejillón de Galicia.
-
Rango da norma:
Orde