Órgano ou entidade impulsora: Secretaría Xeral de Educación e Formación Profesional

Departamento: Consellería de Educación, Ciencia, Universidades e Formación Profesional

Estado actual: Consulta pechada

Prazo no que estivo aberta a consulta: 26/03/2026 - 09/04/2026

Información sobre a norma :

• Antecedentes:

  A Lei orgánica 3/2022, do 31 de marzo, de ordenación e integración da formación profesional, e o seu desenvolvemento mediante o Real Decreto 659/2023, do 18 de xullo, polo que se desenvolve a ordenación do Sistema de formación profesional, e o Real decreto 498/2024, do 21 de maio, polo que se modifican determinados reais decretos polos que se establecen títulos de formación profesional de grao básico e se fixan as súas ensinanzas mínimas, estableceron, entre outras cuestións, os elementos básicos do currículo das distintas ofertas do Sistema de Formación Profesional.

  No exercicio das súas competencias, a Comunidade Autónoma de Galicia aprobou o Decreto 20/2026, do 9 de marzo, polo que se establece a ordenación xeral da formación profesional do sistema educativo de Galicia.

  Unha vez definido este marco de ordenación, resulta necesario completar o seu desenvolvemento normativo mediante a aprobación da regulación específica dos currículos dos ciclos formativos de grao básico, correspondentes á oferta de grao D e nivel 1 do Sistema de Formación Profesional, conducentes á obtención do título de Técnico/a Básico, en coherencia coa normativa básica estatal, o Decreto 20/2026  e coas necesidades do tecido produtivo e social de Galicia.

• Problemas que se pretenden solucionar:

  A implantación do novo Sistema de Formación Profesional require o desenvolvemento autonómico dos currículos dos ciclos formativos de grao básico, que permita a implantación ordenada destas ensinanzas. A ausencia desta regulación 
  pode xerar diferenzas no seu desenvolvemento entre os centros educativos e reduce a seguridade xurídica do sistema, afectando aos centros, ao profesorado e ao alumnado.

• Necesidade e oportunidade da súa aprobación:

  Unha vez aprobado o marco autonómico de ordenación e organización da formación profesional, resulta necesario e oportuno completar o seu desenvolvemento mediante a aprobación da normativa específica que estableza os currículos dos ciclos formativos de grao básico, garantindo a súa adecuación ao novo modelo estatal derivado da Lei orgánica 3/2022.
  
  A aprobación desta orde permitirá unha implantación homoxénea, coherente e xuridicamente segura dos ciclos formativos de grao básico en Galicia, así como a súa adaptación ás necesidades do tecido produtivo, social e territorial.

• Obxectivos:

  Son obxectivos do proxecto de orde:

  • Establecer os currículos dos ciclos formativos de grao básico correspondentes á oferta de grao D e nivel 1 na Comunidade Autónoma de Galicia, adecuándoos ás necesidades actuais e futuras do sistema produtivo galego.
  • Desenvolver e concretar, no ámbito curricular, o disposto na normativa básica estatal e no Decreto 20/2026.
  • Garantir unha implantación homoxénea destas ensinanzas en todos os centros educativos da Comunidade Autónoma.

• Posibles solucións, alternativas, regulatorias e non regulatorias:

  Non é posible conseguir os obxectivos indicados con solucións alternativas reguladoras e non reguladoras.

• Rango da norma:

  Orde

Achegas e opinións recibidas: 4