Órgano ou entidade impulsora: Secretaría Xeral de Educación e Formación Profesional

Departamento: Consellería de Educación, Ciencia, Universidades e Formación Profesional

Estado actual: Consulta pechada

Prazo no que estivo aberta a consulta: 26/03/2026 - 09/04/2026

Información sobre a norma :

• Antecedentes:

  A Lei orgánica 3/2022, do 31 de marzo, de ordenación e integración da formación profesional, e o seu desenvolvemento mediante o Real decreto 659/2023, do 18 de xullo, polo que se desenvolve a ordenación do Sistema de formación profesional, introduciron modificacións no réxime de avaliación, cualificación, acreditación e titulación académica do alumnado, así como na estrutura e organización das distintas ofertas formativas.
  
  No exercicio das súas competencias, a Comunidade Autónoma de Galicia aprobou o Decreto 20/2026, do 9 de marzo, polo que se establece a ordenación xeral da formación profesional do sistema educativo de Galicia.
  
  Unha vez definido este marco de ordenación, resulta necesario completar o seu desenvolvemento normativo mediante a aprobación dunha norma específica que regule de maneira homoxénea a avaliación,  a acreditación e a certificación académica do alumnado de formación profesional, incluíndo o proceso de acreditación de competencias, garantindo a súa adecuación á normativa básica estatal e autonómica.

• Problemas que se pretenden solucionar:

  A normativa autonómica vixente en Galicia en materia de avaliación, acreditación e certificación foi aprobada con anterioridade á entrada en vigor do novo marco normativo estatal e autonómico e non incorpora algúns dos cambios introducidos pola nova normativa.
  
  Esta situación dificulta a aplicación homoxénea da normativa, podendo xerar diferenzas na súa aplicación entre centros educativos e reduce a seguridade xurídica do sistema, afectando ao alumnado, ao profesorado e aos propios centros.

• Necesidade e oportunidade da súa aprobación:

  A Lei orgánica 2/2006, do 3 de maio, de educación e a Lei orgánica 3/2022 establecen o marco xeral da avaliación e da titulación académica nas ensinanzas de formación profesional.
  
  Pola súa banda, o Real decreto 659/2023 regula o dereito a unha avaliación obxectiva, os criterios comúns de avaliación, de certificación, de titulación e de acreditación nas distintas ofertas do Sistema de Formación Profesional.
  
  Neste contexto, e unha vez aprobado o marco autonómico de ordenación e organización da formación profesional polo Decreto 20/2026, resulta necesaria e oportuna a aprobación dunha nova orde que adecúe a normativa autonómica ao novo marco estatal e garanta unha aplicación homoxénea, coherente e xuridicamente segura en Galicia.

• Obxectivos:

  A orde que se proxecta ten como obxectivos:

  • Regular a avaliación, cualificación, promoción, certificación e titulación académica do alumnado que curse ensinanzas de formación profesional na Comunidade Autónoma de Galicia.
  • Regular as probas libres para a superación de módulos profesionais.
  • Regular o procedemento  de acreditación de competencias.
  • Establecer criterios comúns que garantan a obxectividade, transparencia e equidade do proceso de avaliación.

• Posibles solucións, alternativas, regulatorias e non regulatorias:

  Non é posible conseguir os obxectivos indicados con solucións alternativas reguladoras e non reguladoras.

• Rango da norma:

  Orde

Achegas e opinións recibidas: 4