Órgano ou entidade impulsora: Secretaría Xeral de Educación e Formación Profesional

Departamento: Consellería de Educación, Ciencia, Universidades e Formación Profesional

Estado actual: Consulta pechada

Prazo no que estivo aberta a consulta: 26/03/2026 - 09/04/2026

Información sobre a norma :

• Antecedentes:

  A Lei orgánica 3/2022, do 31 de marzo, de ordenación e integración da formación profesional, e o seu desenvolvemento mediante o Real Decreto 659/2023, do 18 de xullo, configuraron un novo Sistema de Formación Profesional, establecendo unha nova estrutura das ofertas formativas, así como os principios xerais de acceso e admisión do alumnado ás distintas ensinanzas do sistema.
  
  No exercicio das súas competencias, a Comunidade Autónoma de Galicia aprobou o Decreto 20/2026, do 9 de marzo, polo que se establece a ordenación xeral da formación profesional do sistema educativo de Galicia.

  Unha vez definido este marco de ordenación, resulta necesario desenvolver de maneira específica o procedemento de acceso e admisión do alumnado, garantindo a súa adecuación á nova normativa, a igualdade de oportunidades no acceso, a obxectividade do procedemento e a transparencia na asignación de prazas.

• Problemas que se pretenden solucionar:

  A normativa autonómica vixente en materia de admisión do alumnado ás ensinanzas de formación profesional foi aprobada con anterioridade á entrada en vigor do novo marco normativo estatal e autonómico e non incorpora algúns dos cambios introducidos pola nova normativa.
  
  Esta situación dificulta a xestión homoxénea e ordenada do procedemento de admisión, pode dar lugar a diferenzas na aplicación dos criterios de prioridade e a unha falta de homoxeneidade entre centros, afectando á seguridade xurídica do sistema e á igualdade de oportunidades do alumnado.

• Necesidade e oportunidade da súa aprobación:

  A Lei orgánica 2/2006, do 3 de maio, de educación, a Lei orgánica 3/2022 e o Real decreto 659/2023 establecen os principios xerais que deben rexer o acceso e a admisión ás ensinanzas de formación profesional, correspondendo ás administracións educativas o seu desenvolvemento e concreción no ámbito das súas competencias.
  
  Unha vez aprobado o marco autonómico polo Decreto 20/2026, resulta necesario e oportuno completar o seu desenvolvemento mediante a aprobación dunha norma específica que regule de forma unificada, clara e coherente o procedemento de acceso e admisión do alumnado.
  
  A aprobación desta orde permitirá garantir un procedemento de admisión transparente, obxectivo e homoxéneo, adaptado ás características do sistema educativo galego e á diversidade das ofertas de formación profesional.

• Obxectivos:

  O proxecto de orde ten como obxectivos:

  • Regular o procedemento de acceso e de admisión do alumnado as ensinanzas de formación profesional sostidas con fondos públicos.
  • Establecer criterios comúns de prioridade, reserva e adxudicación de prazas, garantindo a igualdade de oportunidades no acceso e na admisión.
  • Asegurar a transparencia, obxectividade e publicidade do procedemento de acceso e admisión.
  • Facilitar unha xestión eficaz e homoxénea do proceso de acceso e admisión en todos os centros educativos.

• Posibles solucións, alternativas, regulatorias e non regulatorias:

  Non é posible conseguir os obxectivos indicados con solucións alternativas reguladoras e non reguladoras.

• Rango da norma:

  Orde

Achegas e opinións recibidas: 4