-
Antecedentes:
O 29 de outubro do 2025 publicouse no Diario Oficial de Galicia o Decreto 96/2025, do 6 de outubro, polo que se regula a Certificación Galega de Excelencia en Igualdade e o Rexistro de empresas e entidades do terceiro sector recoñecidas coa Certificación Galega de Excelencia en Igualdade.
O citado decreto ten por obxecto desenvolver a regulación da Certificación Galega de Excelencia en Igualdade, así como crear e regular o rexistro de empresas e entidades do terceiro sector recoñecidas co citado distintivo, dando cumprimento ao disposto no artigo 111.3 da Lei 7/2023, de 30 de novembro, para a igualdade efectiva de mulleres e homes en Galicia. Esta Lei dedica o seu Título III á igualdade de mulleres e homes no emprego e nas relacións laborais, e o capítulo II do citado título, relativo á sostibilidade social empresarial e benestar laboral, regula a Certificación Galega de Excelencia en Igualdade, que se configura como un distintivo outorgado pola Administración autonómica para recoñecer aquelas empresas ou entidades do terceiro sector que destaquen na aplicación das políticas de igualdade para a equiparación laboral entre mulleres e homes.
-
Problemas que se pretenden solucionar:
A norma obxecto desta consulta pública ten por finalidade desenvolver a habilitación normativa prevista na disposición derradeira primeira do Decreto 96/2025, do 6 de outubro, que establece que, mediante orde, se determinará o contido da memoria xustificativa e a documentación oportuna para acreditar o cumprimento das condicións de igualdade e os supostos de alteración ou incumprimento das devanditas condicións que supoñan o empeoramento substancial dos criterios de igualdade para os efectos da aplicación dunha causa de revogación, así como a puntuación mínima para a obtención ou renovación do distintivo e o método de valoración e ponderación dos criterios de igualdade.
-
Necesidade e oportunidade da súa aprobación:
Esta orde pretende dar cumprimento á habilitación normativa de desenvolvemento prevista no Decreto 96/2025, do 6 de outubro, polo que se regula a Certificación Galega de Excelencia en Igualdade e o Rexistro de empresas e entidades do terceiro sector recoñecidas coa Certificación Galega de Excelencia en Igualdade.
De acordo coa disposición adicional segunda do devandito decreto, as solicitudes para a obtención da Certificación Galega de Excelencia en Igualdade poderán presentarse a partir da entrada en vigor da orde obxecto desta consulta pública.
-
Obxectivos:
Esta norma pretende regular:
a) O contido da memoria xustificativa e a documentación oportuna para acreditar o cumprimento das condicións esixidas no artigo 4.1.j), e os supostos de alteración ou incumprimento das condicións do artigo 4.1.j) que supoñan o empeoramento substancial dos criterios de igualdade previstos no artigo 5 para os efectos da aplicación da causa de revogación contida no artigo 14.1.c) 3º.
b) A puntuación mínima para a obtención ou renovación do distintivo e o método de valoración e ponderación dos criterios de igualdade.
-
Posibles solucións, alternativas, regulatorias e non regulatorias:
Publicación dunha orde de desenvolvemento.
-
Rango da norma:
Orde