Órgano ou entidade impulsora: Dirección Xeral de Formación Profesional

Departamento: Consellería de Educación, Ciencia, Universidades e Formación Profesional - Dirección Xeral de Formación Profesional

Estado actual: Consulta pechada

Prazo no que estivo aberta a consulta: 13/02/2026 - 13/03/2026

Información sobre a norma :

• Antecedentes:

  A Lei 9/1992, de educación e promoción de adultos leva máis de 30 anos en vigor, polo que resulta precisa a actualización da mesma.

• Problemas que se pretenden solucionar:

  Ata o de agora, a lei centrábase en que as persoas adultas puidesen obter un título de ensinanza básica logo de non logralo nos seus anos de escolarización obrigatoria. Non obstante, a gran maioría da poboación xa está en posesión deste título. Por iso, a futura norma fíxase como obxectivo a formación permanente ao longo da vida, de xeito que unha persoa poida cualificarse, recualificarse e ter así novas oportunidades de traballo.

  A nova lei suporá:

  • Un cambio de paradigma na aprendizaxe de persoas adultas
  • Unha evolución cara a un sistema integrado baseado en catro piares:
    • Aprendizaxe para o desenvolvemento persoal e social
    • Cualificación e recualificación
    • Información e orientación
    • Innovación e formación de formadores/as

• Necesidade e oportunidade da súa aprobación:

  A realidade actual fai precisa a actualización da lei vixente, para adaptar a formación continua aos cambios sociais, tecnolóxicos, académicos e laborais da actualidade.

  A nova lei diríxese ás persoas de 18 ou máis anos, o que supón que o 60% do total da poboación galega (máis de 1.600.000 persoas) poderá beneficiarse da mesma e terá ao seu alcance accións formativas.

  Con todo, establécense colectivos de atención preferente, en concreto:

  • Grupos en situación de vulnerabilidade
  • Poboación adulta que busca a mellora profesional ou académica

• Obxectivos:

  • Ofrecer un sistema flexible, accesible e transparente para a totalidade da poboación:
    • Desenvolver a Plataforma Dixital de Aprendizaxe Permanente
    • Reducir a burocracia nos procedementos simplificando a tramitación
  • Impulsar o desenvolvemento persoal e social e o coñecemento da nosa lingua e cultura
  • Posibilitar a alfabetización dixital universal e camiñar cara a transición ecolóxica e dixital:
    • Incorporar a intelixencia artificial na xestión do Sistema Integrado
    • Favorecer o acceso á formación a través de medios dixitais
  • Facilitar o acceso e conexión co mercado laboral a todas as persoas adultas
  • Contribuír á equidade, inclusión e á mellora dunha sociedade en constantes cambios

• Posibles solucións, alternativas, regulatorias e non regulatorias:

  Non se atopan outras alternativas posto que se trata de actualizar a lei vixente, dado o tempo transcorrido desde a súa entrada en vigor, fai máis de 30 anos.

• Rango da norma:

  Lei

Achegas e opinións recibidas: 18