Antecedentes:
A Lei 5/1997, do 22 de xullo, de Administración Local de Galicia, tiña como obxectivo facer fronte á definición do papel da nosa comunidade autónoma en relación coas administracións locais e á peculiar organización dos asentamentos urbanos en Galicia.
A experiencia dos 28 anos de vixencia demostrou que a técnica normativa empregada nesta norma revelouse pouco práctica, reproducindo en moitas ocasións a normativa básica estatal en materia de réxime local, que sufriu desde o ano 1997 ao redor de trinta modificacións, introducindo importantes cambios na configuración da administración local.
Tamén desde o ano 1997 a Lei de Administración Local de Galicia foi obxecto de modificacións no seu contido, operadas polas seguintes normas: Lei 8/1999, do 30 de decembro, de medidas fiscais e orzamentarias e de función pública e actuación administrativa; Lei 18/2008, do 29 de decembro, de vivenda de Galicia; Lei 1/2010, do 11 de febreiro, de modificación de diversas leis de Galicia para a súa adaptación á Directiva 2006/123/CE, do Parlamento Europeo e do Consello, do 12 de decembro de 2006, relativa aos servizos no mercado interior; Lei 4/2012, do 12 de abril, da Área Metropolitana de Vigo; Lei 2/2015, do 29 de abril, de Emprego Público de Galicia e Lei 13/2015, do 24 de decembro, de medidas fiscais e administrativas.
Sen embargo estas modificacións non tiveron como obxectivo a súa adecuación normativa ás bases estatais en materia de réxime local xerándose un escenario de inseguridade xurídica que aconsella a súa substitución por unha nova norma que teña en conta a nova realidade da Administración Local. Tampouco estas modificacións abordaron a necesidade de adaptación a normas tan importantes como a Lei 39/2015 e a Lei 40/2015 e as leis sectoriais de importante calado no réxime local, como contratos ou transparencia.
Tendo en conta o tempo transcorrido e á vista do exposto anteriormente, faise necesario e conveniente proceder á aprobación dunha nova lei de administración local de Galicia.
Problemas que se pretenden solucionar:
A nova lei é imprescindible para adaptar o ámbito local galego á importante transformación experimentada como consecuencia dos profundos cambios tecnolóxicos, sociais e normativos producidos nos últimos trinta anos.
Asi, preténdese establecer as especialidades para as entidades locais galegas acorde coa súa actual situación, co obxecto de resolver os problemas e as necesidades detectadas nos últimos anos e mellorar o seu réxime interno de organización e funcionamento mediante a incorporación dos principios da nova xestión pública.
Igualmente preténdese ofrecer una norma cunha sinxela técnica normativa dirixida á simplificación e claridade do novo texto legal, sen reproducir a normativa básica estatal, que permita unha lectura totalmente actualizada para poder resolver os problemas actuais, tendo en conta o carácter bifronte das entidades locais e a complexa articulación da normativa básica e estatal. Evitaríase así a necesidade de ter que reformar a norma autonómica cada vez que se modifique a normativa básica estatal e o perigo, en caso de non facelo, de quedar desactualizada, xerando unha situación de inseguridade xurídica.