A Consellería do Medio Rural, a través do Decreto 149/2011, do 7 de xullo, estableceu o Catálogo oficial de razas gandeiras autóctonas de Galicia, e regulou o recoñecemento oficial das asociacións de criadores de razas autóctonas de Galicia que creen ou xestionen libros xenealóxicos e aprobou os programas para a súa conservación, mellora e fomento.

Este decreto elaborouse coa finalidade de adecuar a normativa autónomica respecto das razas autóctonas galegas á normativa estatal recollida no Real decreto 2129/2008, do 26 de decembro, polo que se establece o programa nacional de conservación, mellora e fomento das razas autóctonas.

A aprobación do Regulamento (UE) 2016/1012, do Parlamento Europeo e do Consello do 8 de xuño de 2016, relativo ás condicións zootécnicas e xenealóxicas da cría, o comercio e a entrada na Unión de animais reprodutores de raza pura, porcinos reprodutores híbridos e o seu material reprodutivo, e polo que se modifican o Regulamento UE nº 652/2014 e as Directivas 89/608/CEE e 90/425CEE do Consello e se derrogan determinados actos no ámbito da cría animal ("Regulamento sobre cría animal"), supuxo a necesidade de adaptar o anterior Real decreto 2129/2008, do 26 de decembro, ás modificacións introducidas pola normativa europea e publicouse a nivel estatal o Real decreto 45/2019, do 8 de febreiro.

No tempo transcorrido dende que se publicou o Decreto 149/2011 producíronse cambios normativos importantes sobre diferentes aspectos e faise necesario adaptalo á normativa vixente para a súa adecuación e para incorporar outros aspectos contemplados no novo marco lexislativo.

A necesidade da aprobación desta modificación xorde coa finalidade de ordenar a normativa autonómica respecto das razas autóctonas galegas á normativa de ámbito estatal e ao novo marco comunitario coa aprobación do Regulamento (UE) 2016/1012, do Parlamento Europeo e do Consello do 8 de xuño de 2016, relativo ás condicións zootécnicas e xenealóxicas para a cría, comercio e entrada na Unión de animais reprodutores de raza pura, porcinos reprodutores híbridos e o seu material reprodutivo.

O obxectivo deste decreto é adaptar o Decreto 149/2011, do 7 de xullo, á normativa estatal aprobada polo Real decreto 45/2019, do 8 de febreiro, actualizando determinados aspectos e termos para incluír as novas obrigas contempladas na normativa vixente.

Debido aos importantes cambios normativos dos últimos anos, nos que as modificacións son tan substanciais, considérase necesario unha regulación máis completa, tendo en conta que a norma vixente non está actualizada.