Órgano ou entidade impulsora: Axencia Galega de Desenvolvemento Rural

Departamento: Consellería de Medio Ambiente, Ordenación do Territorio e Vivenda - Dirección Xeral de Calidade Ambiental, Sostibilidade e Cambio Climático

Estado actual: Consulta pechada

Prazo no que estivo aberta a consulta: 02/03/2022 - 02/04/2022

Información sobre a norma :

• Antecedentes:

  • Hai escasamente un ano este departamento autonómico publicou a Lei 6/2021, do 17 de febreiro, de residuos e solos contaminados de Galicia coa vontade de proporcionar á Comunidade Autónoma de Galicia un réxime xurídico completo e actualizado, de conformidade co marco normativo vixente, en materia de produción e xestión de residuos e logo da aprobación, no ámbito comunitario, dun paquete de medidas destinadas a mellorar e transformar a xestión de residuos na Unión Europea.
  • Tal é o caso da aprobación da Directiva (UE) 2018/851 do Parlamento Europeo e do Consello, do 30 de maio de 2018, pola que se modifica a Directiva 2008/98/CE sobre os residuos que vén a incrementar os obxectivos en materia de preparación para a reutilización e reciclaxe dos residuos e, en particular, polo que atinxe aos biorresiduos, e impón a obriga de establecer medidas para garantir que os biorresiduos ben se separen e reciclen en orixe, ben se recollan de forma separada e non se mesturen con outros tipos de residuos.
  • A normativa básica estatal nesta materia, sinaladamente a Lei 22/2011, do 28 de xullo, de residuos e solos contaminados, ademais de ofrecer unha definición de biorresiduos, insta no seu artigo 24 ás autoridades ambientais a promover medidas para impulsar a recollida separada dos mesmos para destinalos á compostaxe doméstica ou comunitaria.
  • Entre as liñas básicas da política de residuos da Administración xeral da Comunidade Autónoma de Galicia para a consecución dos obxectivos e dos fins pretendidos pola Lei 6/2021 atópase a de colaborar coas entidades locais na xestión daqueles residuos da competencia destas, con especial atención á implantación efectiva da recollida separada en orixe de novas fraccións, en especial dos biorresiduos, para destinalos á compostaxe ou á dixestión anaerobia.
  • No seu artigo 6 a norma autonómica define a compostaxe doméstica como a xestión dos propios residuos domésticos de carácter orgánico biodegradable producidos nos fogares, restaurantes, servizos de restauración colectiva ou establecementos de venda retallista e que se realiza individualmente para a utilización particular do compost resultante. A compostaxe doméstica considérase unha operación de prevención de residuos.
  • Pola súa banda, a compostaxe comunitaria defínese como a xestión dos residuos domésticos de carácter orgánico biodegradable producidos nos fogares, restaurantes, servizos de restauración colectiva ou establecementos de venda retallista nunha instalación común creada para o efecto, co fin de obter un recurso para a súa aplicación como fertilizante ou substrato de cultivo.
  • O réxime xurídico aplicable á compostaxe comunitaria consonte o art. 35 da norma autonómica é o de comunicación previa, réxime que pretende desenvolver a presente disposición.

• Problemas que se pretenden solucionar:

  Tendo en conta os obxectivos impostos pola normativa comunitaria, en particular polo que atinxe aos biorresiduos e á obriga para ás autoridades ambientais, nos seus respectivos ámbitos de competencia, de promover medidas destinadas a impulsar a recollida separada dos mesmos para destinalos á compostaxe doméstica ou comunitaria, valorouse a oportunidade de abordar o desenvolvemento regulamentario do réxime xurídico contemplado no art. 35 da Lei 6/2021, antes citada, coa vontade de reforzar a confianza e seguridade xurídica nas posibilidades que ofrecen as instalacións de compostaxe a fin de favorecer a súa implantación e emprego mediante a difusión das súas características, requirimentos e potencialidades aos efectos dos beneficios e obxectivos a acadar.

• Necesidade e oportunidade da súa aprobación:

  A necesidade e oportunidade da norma xustifícase:

  • Por unha banda, pola vontade de facilitarlles ás entidades locais a implantación da compostaxe comunitaria consonte ao réxime xurídico contemplado na Lei 6/2021, do 17 de febreiro, de residuos e solos contaminados de Galicia.
  • Por outra, co ánimo de contribuír a acadar os obxectivos de preparación para a reutilización e reciclaxe impostas pola normativa comunitaria no tocante aos biorresiduos.
  • Así como, dentro das liñas básicas da política de residuos consagradas no art. 6 da Lei 6/2021, colaborar coas entidades locais na xestión daqueles residuos da competencia destas, con especial atención á implantación efectiva da recollida separada en orixe de novas fraccións, en especial dos biorresiduos, para destinalos á compostaxe ou á dixestión anaerobia.

• Obxectivos:

  O obxecto da futura norma regulamentaria autonómica sería o de establecer o réxime xurídico e as condicións técnicas das instalacións e actividades de compostaxe comunitaria na Comunidade Autónoma de Galicia que, co fin de promover a súa práctica, contribúa a lograr un elevado nivel de protección ambiental e cuxo resultado responda a uns estándares de alta calidade axeitados.

  É dicir, determinar en que casos a actividade de compostaxe comunitaria podería someterse ao réxime de comunicación por cumprir os condicionantes ou previsións  contidas na nova norma de xeito que, en base ás súas características e mínimas afeccións ao ambiente, permitirían diferenciala doutras actividades consideradas tratamento de residuos e sometidas a autorización.

  Preténdese así mesmo coa nova regulación favorecer a implantación das actividades de compostaxe comunitaria nun marco de seguridade xurídica.

• Posibles solucións, alternativas, regulatorias e non regulatorias:

  A alternativa sería limitarse á previsión contida na Lei 6/2021, que simplemente refire a comunicación como réxime de intervención administrativa aplicable á compostaxe comunitaria. Non obstante, o feito de desenvolver regulamentariamente esta previsión comporta importantes beneficios en termos de favorecer o coñecemento e a confianza na implantación destas actividades, nun contexto de seguridade xurídica, ao tempo que se trata de contribuír a acadar o cumprimento dos obxectivos impostos en materia de xestión de biorresiduos, consonte ás obrigas inminentes ás que deberán facer fronte as entidades locais no marco das súas competencias.

• Rango da norma:

  Decreto

Achegas e opinións recibidas: 2