-
Antecedentes:
A Lei 2/2008, do 6 de maio, pola que se desenvolve a libre prestación de servizos de transporte marítimo de persoas en augas interiores de Galicia creou o Rexistro de Empresas Operadoras do Transporte Marítimo, orientado a garantir os dereitos das persoas consumidoras e usuarias a través da inscrición e publicidade dos servizos de transporte público marítimo que se presten nas augas interiores da comunidade.
Os requisitos e o procedemento para acceder ao dito rexistro reguláronse a través do Decreto 228/2008, do 2 de outubro, sobre a prestación de servizos de transporte marítimo de persoas en augas interiores de Galicia, norma que desde entón vén disciplinando o funcionamento do rexistro, encadrado baixo a responsabilidade da consellería competente en materia de transporte marítimo.
-
Problemas que se pretenden solucionar:
Exceso de documentación administrativa.
Excesivo tempo de tramitación dos procedementos.
-
Necesidade e oportunidade da súa aprobación:
Trátase de incorporar os principios reitores da normativa de libre acceso ás actividades de servizos e o seu exercicio que se prevén na Lei 20/2013, do 9 de decembro, de garantía da unidade de mercado, aplicable ao sector do transporte e enfocados a mudar o concepto de habilitación administrativa por outro que elimine regulacións innecesarias, estableza procedementos máis áxiles e minimice cargas administrativas, tendo en conta que se trata dun sector, o do transporte marítimo, que está liberalizado en Galicia desde a entrada en vigor da mencionada Lei 2/2008. Deste xeito, o deseño dun procedemento inscrición que reduza as cargas administrativas para as entidades interesadas resulta especialmente aconsellable, e permitirá cumprir con maior eficacia co obxectivo de protexer os dereitos das persoas consumidoras e usuarias que establece a dita lei.
Por outra banda, pretende adaptarse a tramitación administrativa ao previsto na Lei 39/2015, do 1 de outubro, do procedemento administrativo común das administracións públicas, no que se refire á tramitación electrónica do procedemento.
-
Obxectivos:
Redución de cargas administrativas.
Procedemento administrativo máis áxil e simplificado.
Maior precisión dos servizos de transporte que deben constar no Rexistro.
-
Posibles solucións, alternativas, regulatorias e non regulatorias:
Substitución da obriga de presentar documentación por declaración responsable da empresa solicitante.
Tramitación electrónica obrigatoria dos procedementos de inscrición no Rexistro.
-
Rango da norma:
Decreto