Departamento: Consellería de Sanidade

Estado actual: Consulta pechada

Prazo no que estivo aberta a consulta: 19/09/2017 - 03/10/2017

Información sobre a norma :

• Antecedentes:

  A normativa de ordenación farmacéutica na nosa Comunidade Autónoma data de 1999. Desde ese ano os avances que se producen na sociedade e a necesidade de configurar un sistema que garanta a prestación farmacéutica nos vindeiros anos aconsellan elaborar unha nova norma legal.

• Problemas que se pretenden solucionar:

  É necesario que a ordenación farmacéutica teña máis vinculación coa ordenación sanitaria xeral de forma que a prescrición e a dispensación de medicamentos sexa un continuo para os pacientes.

  A crecente despoboación de zonas rurais da Galicia interior obriga a establecer un marco regulatorio máis flexible, garantindo que a poboación desas zonas teña acceso aos medicamentos que precisen.

• Necesidade e oportunidade da súa aprobación:

  A necesidade dunha nova norma vén dada polo propia evolución da sociedade e da sanidade nos últimos 18 anos, nos que a prestación farmacéutica hospitalaria aumentou a súa importancia tanto cualitativa como cuantitativa.

  A oportunidade vén dada pola importancia crecente de modalidades asistenciais como a hospitalización a domicilio, a hospitalización sen ingreso, a necesidade de coordinación sociosanitaria, as pluripatoloxías e as necesidades crecentes de fármacos dispensados nos diferentes niveis asistenciais.

• Obxectivos:

  Adecuar a regulación legal ás novas necesidades e prestacións nun contexto de maior supervivencia e envellecemento da poboación.

  Posibilitar unha ordenación farmacéutica que asegure que os/as usuarios/as de medicamentos poidan dispor deles con independencia do lugar no que residan.

• Rango da norma:

  Lei