-
Antecedentes:
Ao abeiro do Decreto 428/1993, foi publicada a Orde do 13 de xuño de 1994 pola que se regulan os órganos de goberno dos centros de formación náutico-pesqueira, dependentes da Consellería de Pesca, Marisqueo e Acuicultura, que desenvolve e regula o preceptuado no título terceiro da Lei orgánica 8/1985, do 3 de xullo, reguladora do dereito á educación.
A Lei orgánica 2/2006, do 3 de maio, de educación, regula no seu capítulo IV do título V, as Direccións dos centros docentes públicos que imparten as ensinanzas reguladas na lei, e no capítulo III do mesmo título o Consello Escolar e o Claustro de Profesorado, como órganos colexiados de goberno dos centros públicos.
A Lei orgánica 8/2013, do 9 de decembro, para a mellora da calidade educativa, modificou algúns aspectos da regulación establecida na Lei 2/2006 no relativo as competencias e aos procedementos de selección dos órganos de goberno dos centros públicos.
-
Problemas que se pretenden solucionar:
A Orde do 13 de xuño de 1994 contemplaba a selección da Dirección dos centros polo Consello Escolar e a Lei orgánica 2/2006 indica que a selección e o nomeamento da Dirección dos centros públicos ten que efectuarse mediante un concurso de méritos.
En referencia aos requisitos da persoa candidata que opte á Dirección, conforme á Orde do ano 1994 tiña que ser profesorado con destino definitivo no centro, e a Lei orgánica non recolle tal esixencia cando establece os requisitos para poder participar no concurso de méritos.
-
Necesidade e oportunidade da súa aprobación:
Dado o tempo transcorrido cómpre actualizar a regulación dos órganos de goberno dos centros de formación náutico e marítimo-pesqueira establecida na devandita Orde do ano 1994 conforme á normativa vixente.
-
Obxectivos:
A presente orde ten por obxecto regular os órganos de goberno dos centros oficiais de formación náutico e marítimo pesqueira dependentes da Consellería do Mar, no relativo ao procedemento de selección, nomeamento e funcións.
-
Posibles solucións, alternativas, regulatorias e non regulatorias:
Non existe outra opción non regulatoria porque se trata substituír unha orde reguladora e ten que ser cunha norma do mesmo rango regulamentario.
-
Rango da norma:
Orde