-
Antecedentes:
O artigo 10º da Lei 3/2013, do 20 de maio, de impulso e ordenación das infraestruturas de telecomunicacións de Galicia, establece que os proxectos de obra pública promovidos polas administracións públicas, deberán prever a instalación de canalizacións relativas aos servizos de comunicacións electrónicas así como a reserva de espazos habilitados para equipamentos de telecomunicacións e localizacións de radiocomunicacións.
As redes de telecomunicacións constitúense como o elemento base que permitirá a prestación dos servizos dixitais avanzados precisos para a evolución da actividade empresarial, e así se reflicte na Axenda Dixital de Galicia 2020 e na Axenda de Competitividade de Galicia.
Asegurar nas áreas empresariais a posibilidade de implantación das redes de telecomunicacións permitirá avanzar na transformación dixital do sector empresarial galego, o que lles permitirá ás empresas ofrecer produtos e servizos de maior valor engadido e manterse constantemente á vangarda nun mercado global.
-
Problemas que se pretenden solucionar:
Para poder incorporar as vantaxes das novas tecnoloxías ás empresas, é esencial prever nas áreas empresariais as infraestruturas de soporte para o despregamento de redes de telecomunicación e os espazos de reserva habilitados para a colocación de equipamento de telecomunicacións e localizacións de radiocomunicacións.
-
Necesidade e oportunidade da súa aprobación:
A previsión e incorporación destas infraestruturas de soporte e reserva de espazos necesarios para o despregamento de redes de comunicacións electrónicas nos proxectos de obras relativos a áreas empresariais promovidos polas administracións públicas de Galicia facilitará moi significativamente o aproveitamento e despregamento de redes e servizos dixitais avanzados, de forma rápida e eficiente.
Así mesmo, cúmprese coa determinación 4.6.3 das Directrices de Ordenación do Territorio que establecen que en toda planificación de obras de urbanización preveranse os espazos e sistemas necesarios que faciliten a implantación posterior de redes de telecomunicacións.
-
Obxectivos:
Establecer o marco normativo relativo á previsión da instalación de infraestruturas de soporte específicas para o despregamento das redes de comunicacións electrónicas e de espazos de reserva habilitados exclusivamente para a colocación de equipamento de telecomunicacións e localizacións de radiocomunicacións nas áreas empresariais que sexan promovidas polas administracións públicas de Galicia.
-
Posibles solucións, alternativas, regulatorias e non regulatorias:
O presente decreto desenvolve o artigo 10 da Lei 3/2013 "Os proxectos de obra pública promovidos polas administracións públicas de Galicia no ámbito das súas respectivas competencias deberán prever, na forma que regulamentariamente se determine, a instalación de canalizacións relativas aos servizos de comunicacións electrónicas, así como a reserva de espazos adecuados para equipamentos de telecomunicacións e para localizacións de radiocomunicacións."
Dado que o dito artigo xa prevé que deberá determinarse regulamentariamente as infraestruturas a instalar non cabe alternativa á elaboración dun regulamento como o que se pretende.
-
Rango da norma:
Decreto