-
Antecedentes:
Galicia conta cun tecido social extenso, plural e activo, representado por entidades e organizacións que xorden da libre iniciativa cidadá e canalizan a solidariedade organizada e a participación social da cidadanía, en xeral, e das propias persoas, familias, grupos ou comunidades afectadas por unha situación, problema ou necesidade de carácter social. Estas entidades de iniciativa social, que xorden da sociedade galega e contan cunha base social integrada por persoas socias e persoas voluntarias, ademais de, habitualmente, persoal contratado remunerado, e cuxo fin ou misión principal consiste en realizar actividades no ámbito da intervención social, conforman o terceiro sector da acción social en Galicia.
Son organizacións que traballan a favor das persoas maiores, da infancia e da adolescencia, da mocidade, das mulleres, das persoas que sofren ou sufriron a violencia de xénero, das persoas con discapacidade ou con dependencia, das persoas afectadas por unha enfermidade, das persoas inmigrantes, das persoas en situación de desemprego, das persoas en situación ou risco de exclusión social, así como doutras persoas ou grupos, ou da poboación en xeral. En consecuencia, o seu ámbito de actuación abrangue, non só o ámbito dos servizos sociais en sentido estrito, senón tamén outros ámbitos encadrados nas políticas sociais en sentido amplo, como o emprego, a vivenda, a sanidade, a educación, a accesibilidade ou o sistema de garantía de ingresos e para a inclusión social.
-
Problemas que se pretenden solucionar:
Cómpre ordenar e dotar dun estatuto xurídico común, propio e específico ao conxunto das numerosas entidades e organizacións que integran o terceiro sector da acción social en Galicia, que presentan unha grande diversidade e heteroxeneidade, tanto na súa forma xurídica como na súa organización, obxecto e funcionamento.
Desta maneira, preténdese, por unha banda, fortalecer ás entidades e organizacións do terceiro sector da acción social, tendo en conta o seu rol cada vez máis importante como provedoras de servizos de benestar, e por outra, reforzar a propia estruturación do terceiro sector da acción social en Galicia, mediante o apoio ás redes de organizacións e á súa converxencia, e impulsar tanto o diálogo da sociedade civil co sector público como o diálogo dos diferentes sectores e axentes sociais sobre o modelo de sociedade e de desenvolvemento, e sobre a acción de cada un deles.
-
Necesidade e oportunidade da súa aprobación:
A necesidade de aprobar esta nova lei vén xustificada pola importante presenza destas entidades en Galicia, dado que existen preto de 1.500 entidades que integran o terceiro sector da acción social de Galicia, que veñen realizando un número moi importante de intervencións sociais na nosa comunidade autónoma.
Esta realidade, unida á dispersión territorial, á existencia de núcleos de poboación moi pequenos e a un envellecemento elevado, deulles unha maior relevancia a estas entidades que presentan un importante arraigamento e implantación no territorio, circunstancia que as configura como entidades idóneas, pola súa maior proximidade e relación cos cidadáns, para detectar e dar cobertura a determinadas situacións de maior vulnerabilidade social.
A multiplicidade e diversidade das entidades e organizacións do terceiro sector da acción social en Galicia fai necesario aprobar unha regulación que permita ordenalas, delimitar as súas características ou elementos definitorios e establecer os principios que deben informar a súa acción, así como a acción do sector público en relación coas devanditas organizacións.
-
Obxectivos:
- Reforzar a colaboración entre as Administracións públicas e o terceiro sector da acción social no deseño das políticas sociais para responder aos desafíos dunha sociedade global.
- Articular e consolidar os espazos de cooperación e coordinación entre as distintas ramas da protección social (sanitaria, educativa, emprego, vivenda...) coa implicación do terceiro sector.
- Avanzar cara a novas formas de relación coa sociedade civil, que permitan promover un modelo de Administración aberta, na que as entidades do terceiro sector teñen unha maior implicación e un maior protagonismo nos asuntos públicos desde a perspectiva do servizo ás persoas.
-
Posibles solucións, alternativas, regulatorias e non regulatorias:
Considérase imprescindible a regulación dun estatuto xurídico común, propio e específico para o conxunto das entidades e organizacións que integran o terceiro sector da acción social en Galicia mediante a aprobación dunha norma con rango de lei.
-
Rango da norma:
Lei