-
Antecedentes:
De conformidade co disposto nos artigos 148.1.3 da Constitución española e 27.3 do Estatuto de Autonomía de Galicia, corresponde en exclusiva á comunidade autónoma galega a competencia en materia de ordenación do territorio, no ámbito da observancia da lexislación básica que, en garantía da igualdade de todos os españois para a protección do medio ambiente, corresponde ao Estado, segundo o disposto nos artigos 149.1.8 e 23 da Constitución Española.
Ao abeiro da devandita atribución competencial aprobouse a Lei 10/1995, do 23 de novembro, de ordenación do territorio de Galicia, que foi desenvolvida a través do Decreto 80/2000, do 23 de marzo, polo que se regulan os plans e proxectos de incidencia supramunicipal, e que veu completar o sistema de planificación urbanística con outro sistema, o de ordenación territorial, que puidese solucionar as insuficiencias que ofrecía aquel e na que se definiu unha serie de instrumentos de ordenación territorial orientados, fundamentalmente, a corrixir os desequilibrios territoriais e mellorar a coordinación das actuacións territoriais supramunicipais.
-
Problemas que se pretenden solucionar:
Actualización normativa: tras máis de dúas décadas de vixencia, ofrecer solucións ás necesidades e problemática detectadas.
Simplificación administrativa: tramitación dos diferentes instrumentos, integrando a tramitación ambiental e reducindo trámites.
Simplificación normativa: derrogando a Lei 6/2007, do 11 de maio, de medidas urxentes en materia de ordenación do territorio e do litoral de Galicia; e incorporando a regulación que respecto dos plans e proxectos sectoriais se contén actualmente no Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, así como o de cantas cuestións se considere necesario abordar xa dende a propia norma a tramitar.
-
Necesidade e oportunidade da súa aprobación:
A consecución dos obxectivos sinalados pola Estratexia Europea de Ordenación do Territorio, a necesaria adaptación do contido da Lei de ordenación do territorio da comunidade aos mesmos e os anos de aplicación da lei que poñen de manifesto as debilidades e fortalezas da mesma xustifican a revisión e consecuente actualización da normativa propia da Comunidade Autónoma de Galicia.
-
Obxectivos:
Xa dende o ano 1999 a Estratexia Europea de Ordenación do Territorio contempla que as políticas de desenvolvemento territorial deben orientarse a acadar un desenvolvemento equilibrado e sostible do territorio da Unión.
Segundo se recolle neste documento, é importante asegurar que os tres seguintes obxectivos fundamentais da política europea se logren por igual en todas as rexións da Unión Europea: a cohesión económica e social, a conservación e xestión dos recursos naturais e do patrimonio cultural e a competitividade máis equilibrada do territorio europeo.
Neste senso, a achega das políticas de desenvolvemento territorial consiste en promover o desenvolvemento sostible da Unión Europea mediante unha estrutura equilibrada do territorio, para o cal se acordaron os tres principios ou directrices da política de desenvolvemento territorial da Unión Europea:
- O desenvolvemento dun sistema equilibrado e policéntrico de cidades e unha nova relación entre campo e cidade,
- A garantía dun acceso equivalente ás infraestruturas e ao coñecemento,
- O desenvolvemento sostible, a xestión intelixente e a protección da natureza e do patrimonio cultural.
Asemade, considérase necesario incorporar a tramitación ambiental dos instrumentos de ordenación territorial ao contido da propia lei, simplificando e clarificando na medida do posible os diferentes procedementos de aprobación e modificación dos mesmos.
-
Posibles solucións, alternativas, regulatorias e non regulatorias:
A alternativa a esta nova regulación sería unha modificación da vixente Lei 10/1995, do 23 de novembro, de ordenación do territorio de Galicia e do Decreto que a desenvolve, pero polos motivos expostos anteriormente considérase procedente abordar unha reforma integral da mesma, co fin de facilitar o seu manexo e mellorar a seguridade xurídica dos cidadáns, en lugar de modificala parcialmente.
-
Rango da norma:
Lei