Departamento: Consellería de Cultura, Educación e Universidade - Dirección Xeral de Centros e Recursos Humanos

Estado actual: Consulta pechada

Prazo no que estivo aberta a consulta: 02/07/2021 - 17/07/2021

Información sobre a norma :

• Antecedentes:

  Decreto 254/2012, do 13 de decembro, polo que se regula a admisión de alumnado en centros sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato (DOG núm. 245, do 26 de decembro).

• Problemas que se pretenden solucionar:

  A Lei orgánica 3/2020, do 29 de decembro, pola que se modifica a Lei orgánica 2/2006, do 3 de maio, de educación (en diante LOE), introduce nesta, ente outras, modificacións que afectan aos criterios de admisión de alumnado (artigo 84) e á determinación das áreas de influencia dos centros docentes públicos e privados concertados (artigo 86), que estarán vixentes no curso 2022/23.

  O novo decreto pretende incorporar as modificacións lexislativas mencionadas, reestruturar os contidos e delimitar certos conceptos vinculados ao procedemento de admisión.

• Necesidade e oportunidade da súa aprobación:

  É necesario incluír na normativa autonómica sobre admisión as modificacións introducidas na regulación da LOE, e ademais, esta norma autonómica ten que estar vixente no curso escolar 2022/23. Polo tanto, ao longo do 2021, cómpre elaborar o decreto, que incluirá as cuestións nas que a normativa autonómica desenvolve a lei.

  Ademais da necesidade indicada, é conveniente efectuar unha reestruturación dos contidos e a delimitación de certos conceptos vinculados ao procedemento de admisión.

• Obxectivos:

  1. Incluír na normativa autonómica sobre admisión as modificacións introducidas na regulación da LOE.
  2. Reestruturar os contidos e delimitar certos conceptos vinculados ao procedemento de admisión.

• Posibles solucións, alternativas, regulatorias e non regulatorias:

  A alternativa á elaboración do presente decreto sería a modificación puntual do decreto anterior, para incorporar as modificación lexislativas introducidas, basicamente, nos artigos 84 e 86 da LOE. Pero resulta máis adecuado elaborar un novo decreto que substitúa ao anterior, para efectuar unha reestruturación dos contidos, delimitar certos conceptos vinculados ao procedemento de admisión do alumnado e incorporar o resultado da experiencia dos últimos anos, actuando dende a perspectiva que dá a implantación da Administración electrónica.

• Rango da norma:

  Decreto