-
Antecedentes:
O decreto polo que se regula a composición e o funcionamento do Consello de Centros Museísticos de Galicia atopa a súa razón de ser na recentemente aprobada Lei 7/2021, do 17 de febreiro, de museos e outros centros museísticos de Galicia. O seu artigo 10 crea o Consello de Centros Museísticos de Galicia como órgano colexiado asesor do Sistema de centros museísticos de Galicia, adscrito á consellería con competencias en materia de centros museísticos. Neste mesmo artigo 10 esbózanse a estrutura, as funcións e o réxime xeral de funcionamento deste órgano, remitíndose á correspondente norma regulamentaria de desenvolvemento os aspectos máis concretos do seu réxime xurídico.
Co obxectivo de delimitar máis polo miúdo e complementar a regulación legal, faise necesario desenvolver regulamentariamente o previsto no artigo 10 da Lei 7/2021, do 17 de febreiro, sobre todo no que se refire á composición e ao funcionamento do Consello de Centros Museísticos de Galicia.
-
Problemas que se pretenden solucionar:
Preténdense acoutar neste futuro decreto os criterios que deben terse en conta no nomeamento de vogais deste órgano, sen perder de vista a pluralidade, a representatividade e presenza equilibrada entre homes e mulleres que xa recolle a Lei 7/2021, do 17 de febreiro. Só coa regulación destes criterios se poderá materializar a composición e posta en funcionamento do Consello de Centros Museísticos de Galicia.
Ao mesmo tempo, tamén se concretarán os aspectos de funcionamento precisos para a súa operatividade, no que se refire ás funcións que asumen os seus membros, mecanismos de funcionamento etc.
-
Necesidade e oportunidade da súa aprobación:
Este decreto é necesario para facilitar a posta efectiva en funcionamento do Consello de Centros Museísticos de Galicia, órgano que deberá intervir, a través dos seus informes, en cuestións que afectan directamente ao Sistema de centros museísticos de Galicia, tanto no plano normativo, como no da creación de centros, así como noutras cuestións do ámbito museístico.
A súa posta en funcionamento resulta esencial dado que este órgano deberá informar, entre outros, sobre os regulamentos que se diten en desenvolvemento da Lei 7/2021, do 17 de febreiro, debendo ser este, polo tanto, o primeiro deses desenvolvementos.
-
Obxectivos:
- Facilitar a posta en funcionamento do Consello de Centros Museísticos de Galicia.
- Enriquecer a actividade do sector museístico e, máis particularmente, do Sistema de centros museísticos de Galicia, a través da actividade deste órgano de composición plural no que deberán estar representadas as distintas modalidades de centros que regula a lei.
- Facilitar o ulterior desenvolvemento regulamentario doutros aspectos da regulación legal en materia de museos e outros centros museísticos de Galicia.
-
Posibles solucións, alternativas, regulatorias e non regulatorias:
Para contar coa regulación completa do órgano de referencia e para o seu funcionamento efectivo, a única alternativa pasa pola regulación mediante decreto, tal como prevé a lei. Non existe, polo tanto, outra alternativa.
-
Rango da norma:
Decreto