O artigo 51 da Lei 3/2012, do 2 de abril, do deporte de Galicia dispón que as federacións deportivas galegas son entidades privadas, sen ánimo de lucro, con personalidade xurídica propia e plena capacidade de obrar, cuxo ámbito de actuación se estende ao territorio da Comunidade Autónoma de Galicia.

As federacións deportivas galegas, no seu funcionamento, exercen tanto funcións privadas como funcións públicas, polo que a normativa que desenvolva o réxime xurídico destas debe combinar e respectar a autonomía organizativa no ámbito privado e delimitar e regular expresamente todos os aspectos relacionados co ámbito das funcións públicas delegadas, atendendo á necesaria protección dos intereses públicos derivados da súa condición de axentes colaboradores da Administración, actuacións que exercen baixo a tutela e a coordinación da Administración deportiva autonómica.

Esa condición de axentes colaboradores da Administración, no exercicio das funcións delegadas por esta, leva a que se precise dunha regulación que garanta en todo momento o correcto exercicio das mencionadas funcións públicas, dotando ás federacións e á Administración de mecanismos suficientes para non menoscabar os dereitos dos clubes, dos/as deportistas, dos/as adestradores/as e dos/as árbitros/as que forman parte dos distintos estamentos federativos.

A experiencia na aplicación da Lei 3/2012 do 2 de abril, do deporte de Galicia e do Decreto 228/1994, de 14 de xullo, regulador das federacións deportivas galegas demanda a necesaria actualización do ámbito regulativo das Federacións Deportivas Galegas.

Establecer un regulamento que proporcione a debida seguridade xurídica sobre os seguintes aspectos de regulación das Federacións Deportivas Galegas:

• Réxime xurídico
• Ámbito territorial
• Protección e apoio polas Administracións públicas
• Unidade federativa
• Idioma, símbolos e logos oficiais
• Formación dunha federación deportiva
• Constitución de novas federacións deportivas
• Tramitación administrativa
• Funcións das federacións deportivas galegas
• Membros das federacións deportivas galegas
• Censo da federación deportiva
• Dereitos e obrigas dos membros da federación deportiva
• Estatuto dos directivos da federación deportiva
• Estatutos e regulamentos das federacións deportivas
• Estrutura orgánica das federacións deportivas galegas
• Réximes das federacións deportivas galegas
• Réxime documental
• Réxime económico-patrimonial
• Réxime electoral
• Réxime disciplinario das federacións deportivas galegas
• Extinción das federacións deportivas galegas

A día de hoxe soamente se contempla como solución a aprobación dun novo decreto.