-
Antecedentes:
A Comunidade Autónoma de Galicia ten competencia exclusiva en materia de asistencia social consonte ao disposto no artigo 27.23 do seu Estatuto de Autonomía.
O actual Decreto 329/2005, do 28 de xullo, polo que se regulan os centros de menores e os centros de atención á infancia aprobouse no marco desta competencia e da normativa vixente no momento da súa publicación.
-
Problemas que se pretenden solucionar:
Transcorridos xa case 20 anos da súa publicación é imprescindible aprobar unha nova regulación desta materia que recolla e se adapte as realidades normativas actuais, tanto dende o punto de vista autonómico como estatal, garantindo que se contemple a evolución das políticas e das necesidades sociais.
No ámbito autonómico: Lei 13/2008, de 3 de decembro, dos servizos sociais de Galicia; Lei 3/2011, de 30 de xuño, de apoio á familia e á convivencia de Galicia; Lei 5/2021, de 2 de febreiro, de impulso demográfico de Galicia; Decreto 245/2011, de 23 de decembro, polo que se regula o réxime de rexistro, autorización, acreditación e a inspección dos servizos sociais de Galicia e o Decreto 192/2015, polo que se define a Carteira de servizos sociais de familia, infancia e adolescencia; Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia.
No ámbito estatal: Lei orgánica 3/2020, de 29 de decembro, pola que se modifica a Lei orgánica 2/2006, de 3 de maio, de Educación; Real decreto 95/2022, de 1 de febreiro, polo que se establece a ordenación e as ensinanzas mínimas da Educación Infantil; Real decreto 132/2010, de 12 de febreiro, polo que se establecen os requisitos mínimos dos centros que impartan as ensinanzas do segundo ciclo da educación infantil, a educación primaria e a educación secundaria.
Polo tanto, trataríase dunha adaptación normativa e dunha regulación independente dos recursos de atención á infancia.
-
Necesidade e oportunidade da súa aprobación:
O transcurso do tempo , a promulgación de nova normativa , a aparición de novas realidades sociais e a consideración do ciclo 0-3 como a primeira etapa educativa fan necesaria e oportuna unha nova regulación dos centros de atención á infancia.
Un novo decreto permitiría actualizar a normativa, establecendo criterios claros para todos os centros, independentemente da súa tipoloxía e asegurarían un nivel homoxéneo de atención para todos os nenos e nenas en Galicia.
-
Obxectivos:
A futura norma ten por obxecto diferenciar a regulación dos centros de atención á infancia da regulación dos centros de menores e adaptala ao contexto actual.
Esta distinción é fundamental para garantir que cada tipo de centro reciba a regulación específica para as súas necesidades, co fin de asegurar a calidade na atención, así como a protección dos dereitos dos menores en función das súas circunstancias.
-
Posibles solucións, alternativas, regulatorias e non regulatorias:
Coa nova normativa pretendese unificar a tipoloxía dos diferentes centros de atención á infancia existentes na actualidade e dar cabida a novas figuras xurdidas tanto no eido da conciliación como no ámbito demográfico.
A norma debe garantir que todos os centros, tanto públicos como privados, cumpran coas mesmas esixencias de calidade, de modo que todos os nenos e nenas reciban a mellor atención posible independentemente do tipo de centro ao que asistan.
-
Rango da norma:
Decreto