-
Antecedentes:
A normativa actual en materia de xogo data de 1985 coa Lei 14/1985, do 23 de outubro como consecuencia da legalización do xogo en España e para establecer con rango normativo aspectos fundamentais relativos aos xogos e apostas lícitas dentro do marco do Convenio asinado co Estado.
Durante varios anos e coa finalidade de dar resposta aos cambios na concepción tradicional do xogo realizáronse modificacións desta lei e aprobáronse novos regulamentos en cada sector do xogo, entre os que se pode mencionar, o Decreto 39/2008, do 21 de febreiro polo que se aproba o Regulamento de máquinas recreativas e de azar da Comunidade Autónoma de Galicia, o Decreto 181/2002, do 10 de maio polo que se aproba o Regulamento do xogo do bingo, Decreto 162/2012, do 7 de xuño, polo que se aproba o Regulamento de apostas da Comunidade autónoma de Galicia e o Decreto 37/2016, do 17 de marzo, polo que se aproba o Regulamento de casinos de xogo da Comunidade Autónoma de Galicia xunto coas súas correspondentes modificacións.
-
Problemas que se pretenden solucionar:
Co novo texto se pretende actualizar e mellorar o contido da vixente lei de 1985.
-
Necesidade e oportunidade da súa aprobación:
Tendo en conta a antigüidade da vixente lei de xogo, considérase necesario elaborar un novo marco xurídico adaptado aos actuais usos sociais, as necesidades do sector e da sociedade en xeral coa finalidade de conseguir unha maior seguridade xurídica na regulación desta materia.
Transcorridos xa 30 anos dende a aprobación da actual lei, considérase que é o momento axeitado para a elaboración e aprobación dun novo texto normativo que recolla as principais modificacións producidas neste tempo no sector do xogo nas súas distintas modalidades, e inclúa disposicións derivadas da implantación das novas tecnoloxías, da consolidación do xogo na nosa Comunidade e dirixidas a velar por un maior control no desenvolvemento desta actividade que permita a protección dos consumidores e usuarios.
-
Obxectivos:
Entre os obxectivos da norma están: propiciar medidas que faciliten a unidade de mercado para mellorar a competitividade do sector do xogo en Galicia, axustar os procedementos ao disposto na Lei 39/2015, do 1 de outubro, para simplificar a tramitación administrativa, actualización da materia para recoller as necesidades do sector e da sociedade en xeral na procura da consecución dunha conciencia xeral do que se entende como xogo responsable.
Todo iso recollido nunha norma con rango de lei que permita a uniformidade da regulación en materia de xogo e facilite a súa comprensión e aplicación.
Concretamente, esta nova norma, profundará nos aspectos da publicidade, os controis de acceso, o réxime sancionador e a defensa dos menores e persoas con condutas aditivas relacionadas co xogo.
-
Posibles solucións, alternativas, regulatorias e non regulatorias:
Enténdese que xa foron realizadas modificacións na lei nos últimos anos e que non foron suficientes para conseguir os obxectivos pretendidos, polo que se precisa dun novo marco xurídico que achegue solucións aos problemas detectados.
-
Rango da norma:
Lei