Órgano ou entidade impulsora: Dirección Xeral de Centros e Recursos Humanos

Departamento: Consellería de Cultura, Educación e Universidade - Dirección Xeral de Centros e Recursos Humanos

Estado actual: Consulta pechada

Prazo no que estivo aberta a consulta: 23/02/2022 - 09/03/2022

Información sobre a norma :

• Antecedentes:

  1. A Orde do 12 de marzo de 2013 desenvolvía o Decreto 254/2012, 13 de decembro, que regulaba o procedemento de admisión do alumnado en centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato.
  2. O Decreto 13/2022, do 3 de febreiro (DOG núm. 29, do 11 de febreiro), derrogou o anterior decreto, polo que esta orde dítase para desenvolver o novo decreto e regular o procedemento de admisión do alumnado en centros docentes sostidos con fondos públicos.

• Problemas que se pretenden solucionar:

  1. Incluír na orde as modificacións introducidas na normativa autonómica sobre admisión polo Decreto 13/2022, do 3 de febreiro, como consecuencia das modificacións introducidas na Lei orgánica 2/2006, do 3 de maio, de educación pola Lei orgánica 3/2020, do 29 de decembro.
  2. Levar a cabo unha reestruturación e actualización da normativa anterior sobre admisión.

• Necesidade e oportunidade da súa aprobación:

  En primeiro lugar, a necesidade de trasladar e desenvolver mediante orde o Decreto 13/2022, do 3 de febreiro, que incorporou á normativa autonómica sobre admisión as modificacións realizadas na Lei orgánica 2/2006, do 3 de maio, de educación pola Lei orgánica 3/2020, do 29 de decembro.

  Así mesmo, reorganizar o contido, harmonizar o concepto de unidade familiar co utilizado en libros de texto, separar a definición dos criterios de admisión e a forma de acreditalos, axustar esta última á información actualmente dispoñible na plataforma de interoperabilidade e reestruturar o procedemento de escolarización (reserva, admisión ordinaria e escolarización extraordinaria).

  Ademais, a conveniencia de dispoñer dunha orde actualizada, que inclúa os diversos cambios derivados da implantación da administración electrónica e as melloras da aplicación informática de xestión da admisión.

• Obxectivos:

  Por unha banda, dispoñer dunha orde que contemple e desenvolva as modificacións lexislativas indicadas; e, por outra, reestruturar e actualizar a normativa anteriormente existente, elaborando unha norma que se axuste aos principios de transparencia, simplicidade e accesibilidade.

  Non obstante, a norma mantén a regulación de fondo anterior, en canto é acorde coa lexislación vixente e resulta idónea e adecuada para regular satisfactoriamente ao acceso do alumnado ao centro docente, onde se fará efectivo o dereito á educación, respectando os principios de proporcionalidade e de seguridade xurídica.

• Posibles solucións, alternativas, regulatorias e non regulatorias:

  A alternativa á elaboración da presente orde sería a modificación puntual da orde anterior, para incorporar as modificación lexislativas introducidas no Decreto 13/2022, do 3 de febreiro. Non obstante, resulta máis adecuado elaborar unha nova orde que substitúa a anterior, para efectuar unha regulación de conxunto (reestruturar contidos, delimitar conceptos e incorporar o resultado da experiencia dos últimos anos, actuando dende a perspectiva que dá a implantación da administración electrónica), inspirada nos principios de transparencia, accesibilidade, simplicidade, proporcionalidade e seguridade xurídica.

• Rango da norma:

  Orde

Achegas e opinións recibidas: 1