Órgano ou entidade impulsora: Secretaría Xeral Técnica

Departamento: Consellería de Política Social - Secretaría Xeral Técnica

Estado actual: Consulta pechada

Prazo no que estivo aberta a consulta: 04/02/2020 - 08/02/2020

Información sobre a norma :

• Antecedentes:

  O artigo 45.2 do Decreto 254/2011, do 23 de decembro, polo que se regula o réxime de rexistro, autorización, acreditación e inspección dos servizos sociais en Galicia, establece que as persoas usuarias poderán remitir queixas e reclamacións directamente á unidade de inspección de servizos sociais co fin de que as avalíe e, cando proceda, realice as actuacións oportunas. O artigo 6 i) da mesma norma sinala como unha obriga das entidades prestadoras de servizos sociais a de remitir á inspección de servizos sociais unha copia das reclamacións presentadas no libro de reclamacións dos centros dos que son titulares ou xestoras.

  Con esta orde facilítase a presentación das queixas e reclamacións que interpoñen directamente as persoas usuarias destes centros, así como as que achegan as entidades titulares ou xestoras dos mesmos que se presentan no correspondente libro de reclamacións.

  Asemade, a través desta orde modifícase a Orde do 18 de abril de 1996 pola que se desenvolve o Decreto 243/1995, do 28 de xullo, no relativo á regulación das condicións e requisitos específicos que deben cumprir os centros de atención a persoas maiores, e a Orde do 25 de xaneiro de 2008 pola que se regulan os requisitos específicos que deben cumprir os centros de inclusión e emerxencia social.

  Esta modificación motívase na necesidade de adaptar e flexibilizar a configuración e determinados requisitos específicos destes centros á realidade e ás necesidades actuais, dada a antigüidade destas normas.

• Problemas que se pretenden solucionar:

  Con esta nova norma preténdese facilitar as xestións que tanto os cidadáns e as cidadás como as entidades prestadoras de servizos sociais teñen que realizar para achegar á inspección de servizos sociais as queixas e reclamacións en materia de servizos sociais.

  Asemade, coa modificación da normativa prevista preténdese adaptar a configuración e determinados requisitos específicos dos centros de atención a persoas maiores e dos centros de inclusión ás necesidades e esixencias actuais, dado o paso do tempo dende a aprobación da normativa que os regula. O transcurso do tempo e a experiencia acumulada poñen de manifesto a necesidade de adaptar os requisitos específicos destes centros á actualidade normativa e á realidade dos mesmos.

• Necesidade e oportunidade da súa aprobación:

  Esta norma é necesaria polos seguintes motivos:

  • Facilitar ás persoas usuarias a presentación das queixas e reclamacións que presenten directamente á inspección de servizos sociais sobre os centros de servizos sociais.
  • Permitir que as entidades prestadoras de servizos sociais cumpran coa obriga de achegar de forma electrónica as reclamacións que se interpoñan no libro de reclamacións dos seus centros, medio ao que están obrigadas tras a publicación da Lei 39/2015, do 1 de outubro, do procedemento administrativo común das administracións públicas e da Lei 4/2019, do 17 de xullo, de administración dixital de Galicia.
  • Necesidade de adaptar determinados requisitos dos centros de atención a persoas maiores e dos centros de inclusión, co fin de flexibilizar a súa configuración.

• Obxectivos:

  Esta orde ten por obxecto:

  • Regular os procedementos para a presentación directa de queixas e reclamacións en materia de centros, servizos e programas de servizos sociais, e para a remisión polas entidades prestadoras de servizos sociais de reclamacións presentadas no seu libro de reclamacións.
  • Flexibilizar e adaptar a configuración e determinados requisitos específicos dos centros de atención a persoas maiores e dos centros de inclusión, conforme ás necesidades actuais.

• Posibles solucións, alternativas, regulatorias e non regulatorias:

  A día de hoxe soamente se contempla como solución a aprobación desta orde.

• Rango da norma:

  Orde