-
Antecedentes:
Lei 10/2017, do 27 de decembro, de espectáculos públicos e actividades recreativas de Galicia.
-
Problemas que se pretenden solucionar:
A nova norma pretende darlle resposta á reivindicación dos sectores implicados que teñen posto de relevo a necesidade da aprobación dun Regulamento de desenvolvemento da Lei 10/2017, do 27 de decembro, de espectáculos públicos e actividades recreativas de Galicia.
Así mesmo, coa aprobación do novo Decreto preténdese dispoñer dunha normativa regulamentaria específica, que facilite as funcións dos operadores técnicos e xurídicos municipais e, ao mesmo tempo, que as persoas interesadas poidan acadar unha máis sinxela e áxil resolución dos seus procedementos.
-
Necesidade e oportunidade da súa aprobación:
A disposición derradeira quinta da Lei 10/2017, do 27 de decembro, de espectáculos públicos e actividades recreativas de Galicia autoriza ao Consello da Xunta para ditar as disposicións necesarias para o seu desenvolvemento regulamentario. En consecuencia e con independencia do desenvolvemento dos aspectos concretos que se determinan nela, cómpre iniciar os traballos necesarios para a elaboración dun Regulamento xeral que recolla as disposicións precisas en desenvolvemento daqueloutros aspectos que, malia que a norma legal non mencione expresamente para tal fin, necesitan unha regulación máis polo miúdo que a que pode abranguer o marco normativo xenérico dunha lei.
-
Obxectivos:
Considerando a variedade de situacións e a diversidade de intereses concorrentes que abrangue a materia de espectáculos públicos e actividades recreativas, a lei non ten un carácter exhaustivo. Pola contra, cínguese a establecer unha regulación xenérica dos aspectos substanciais. En consecuencia, este decreto ten por obxecto aprobar, no marco do desenvolvemento normativo da Lei 10/2017, do 27 de decembro, de espectáculos públicos e actividades recreativas de Galicia, un Regulamento que estableza unha regulación daqueles aspectos que, pola súa especificidade, non tiñan o seu axeitado encaixe nunha norma de rango legal.
-
Posibles solucións, alternativas, regulatorias e non regulatorias:
Por tratarse do desenvolvemento da lei, este debe efectuarse mediante decreto, que abranga os aspectos non previstos nela, coa finalidade de facilitar as funcións dos operadores técnicos e xurídicos municipais e, ao mesmo tempo, que as persoas interesadas poidan acadar unha máis sinxela e áxil resolución dos seus procedementos.
-
Rango da norma:
Decreto